Lan prekarietatea salatzeko dozenaka lagun batu dira Elorrion

Herritar talde batek deituta elkarretaratzea egin dute, gaur, Elorrioko plazan. Iguria auzoan Abiadura Handiko Trena eraikitzeko lanetan 52 urteko behargin bat hil zen herenegun, bihotzekoak jota. "Lan prekarietatearekin amaitu eta langileen bizitza eta osasuna lehenetsiko dituen lan eredu berri bat" aldarrikatu dute.

Elkarretaratzean batu direnek salatu dutenez " ez da AHTaren eraikuntza lanetan gertatzen den lehen heriotza, dagoneko 11dira makro azpiegitura hau eraikitzen bizia galdu duten pertsonak". Gaineratu dute, aurten, azken hildako honekin, gutxienez 34 langilek galdu dutela bizia Euskal Herrian, lanean edo lanaren ondorioz. "Istripu ez traumatikoak, bihotzekoak eta iktusak, lan heriotzen lehen gauzatzaileak" bihurtu direla nabarmendu dute. Azaldu dutenez, 2020an, heriotza guztien %25 izan ziren eta aurten dagoeneko zortzi langile hil dira arrazoi horrengatik.

"Lanean jasotzen den estresa, presioa, nagusien autoritarismoa,lan ordu luzeak, egonkortasun eza... giltzarri dira horrelako kasuetan, heriotza hauek ez dira kasualitatez gertatzen", elkarretaratzearen deitzaileek nabarmendu dutenez. "Heriotza horien erantzule" jo dute Eusko Jaurlaritza eta eskatu diote langileen baldintzak eta bizitzak babesteko behar diren neurriak har ditzala. " Egoera honekin bukatzeko lan eredu berri bat behar dugu, prekarietatearekin amaitu eta langileon bizitza eta osasuna lehenetsiko dituena".

Erlazionatuak

52 urteko langile bat hil da Abiadura Handiko Trenaren eraikuntzan Elorrion

Elorrio

LAB sindikatuak dioenez behargina bihotzekoak jota hil zen atzo, Iguria auzoko obretan.
Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.