Elorrioko Ferixa Nausikoak

Elorrion uztartzen diren kulturen integraziorako, elkartasun jaia antolatu du Kainabera elkarteak irailaren 8rako

Beste herrialde batzuetatik Elorriora bizitzera etorri diren lagunen integrazioa bultzatzea. Horixe da Kainaberak Ferixa Nausikoetan antolatuko duen elkartasun jaiaren helburu nagusia. Venezuela, Mexiko, Senegal, Kolonbia, India, Bolivia, Mali, Maroko, Argentina eta Euskal Herriko jakiak eta edariak dastatzeko aukera eskainiko dute irailaren 8an, Kanpokalen.

Ekitaldia 11:00etan hasiko da eta eguerdira arte izango da martxan.Antolatzaileek erosketa-txartelak prestatu dituzte, eta jasotako dirua Zaporeak elkarteari emango diote, laugarren urtez. Elkarte honek Grezian dauden migratzaileei jaten ematen dihardu lanean, eta Kainaberak, oraingoan ere, ekimen honetara bideratuko du elkartasun jaian batutakoa.

"Giro zoragarria egoten da. Gainera, komunitate bakoitzak, bere erara jantzita, bere musika eramaten du", azaldu du Bixente Aizpurua Kainaberako kideak.