Adur Aristegiren atxiloketaren harira, mozio bat eztabaidatzen zebiltzan 2010eko martxoan. Herritar ugari bertaratu ziren, eta horien partetik faxista deitu ziotela eta iraindu egin zutela salatu zuen Mari Carmen Muñozek. Salaketaren arabera, Josu Herrero eta Rita Ugarriza ziren horietako bi.
Epaiketa aurtengo otsailean hasi zen, baina atzeratu egin zuten azken orduan akusazioak grabazio bat aurkeztu zuelako. Atzo burutu zen epaiketa, eta dagoeneko sententziaren zain geratu da. Niko Morenok azaldu du euren abokatuek absoluzioa eskatu zutela. Bere arabera, Muñozen interbentzioa ez zela eten igartzen da grabazioan, eta Ugarrizaren ahotsik ez da agertzen. Herreroren kasuan, "hitzartze lasaia" egin zuela dio Morenok. Grabazioaz aparte, udal idazkariak, udaltzain batek eta Mari Carmen Muñozek berak deklaratu zuten epaiketan.
Kartzela zigorrak mantendu dituzte akusazioak eta fiskalak. Morenok kontatu duenez, sententziaren bat egonez gero zigorra leuntzea eskatu zuen defentsak, epaiketa bost urte beranduago egin dela kontuan hartuta. Alde guztiek onartu zuten.