Durangoko Udalak herriko 3.062 luminaria aldatuko ditu azarotik 2026ko uztailera bitartean. Egutegi bat zehaztu du horretarako: lehenengo fasean, azarotik urtea amaitu artekoan, Aliendalde, Tabira, Aramotz eta Astepe inguruetako argiak aldatuko dituzte. Urtarriletik apirilera San Faustokoak, Landakokoak eta Muruetatorrekoak aldatuko dituzte. Azkenik, maiatzetik uztailera, erdigunekoak aldatuko dituzte, Alde Zaharrekoak eta Erretentxukoak.
Udalak urte hasieran hasi zuen herriko argiteria aldatzeko prozesua. Mireia Elkoroiribe alkateak adierazi duenez, proiektua "funtsezkoa" da Durango hobetzeko: "Azpiegiturak berrituko dira, eraginkorragoak, jasangarriagoak eta durangarrok benetan behar dugunera egokituak izateko: argiztapen hobea”.
