Durangoko herritar talde bat energia komunitatea sortzeko lanetan dabil. Joan zen apirilaren 2an azpiegitura sortzeko lehenengo harria ezarri zuten Maristak ikastetxeko berbaldian. Energia komunitateen funtzioak, egitura posibleak eta Durangon garatu daitezkeen proiektuak izan zituzten ardatz. Goiko bideoan egunak emandakoa jaso zuten.
Gaur, apirilak 29, lan-saio berria egingo dute San Antonio ikastetxean. Autokontsumo partekaturako dauden aukerak aztertuko dituzte nagusiki. Izan ere, aurreko jardunaldian irtendako hainbat proposamenek ildo hori izan zuten oinarri. Plataformako kideek azaldu dutenez, "parte-hartzaile askok tokian-tokiko energia berriztagarria sortzearen garrantzia azpimarratu zuten. Proposamenetan nabarmendu zen eguzki-instalazioak sustatzea, bai eraikin publikoetan, bai pribatuetan". Horrez gainera, "funtsezkotzat" jo zuten Durangok "energia berriztagarria ekoizteko dituen aukerak aztertzea". Gaurko jardunaldian gai horri buruzkoak aletuko dituzte. Saioa San Antonio ikastetxean izango da, 18:30ean.
Hurrengo lan-saioa maiatzaren 14an egingo dute, Ibaizabal ikastolan. 18:30etatik aurrera energia komunitateak osatzeko taldeak eratuko dituzte.
