Ekain Zenitagoiak hirugarren urtea egingo du Bigarren Mailan. 2021ean maila honetara igo zen U.D. Ibizarekin eta harrezkero han ibili da. Ibiza mailaz jaitsi da aurten, baina Zenitagoiak maila berean jarraituko du Real Racing Club taldeak fitxatu duelako.
Santanderko futbol klubak gaur eman du fitxaketaren berri bere sare sozialetan. Zenitagoiak 2025eko ekainera arteko kontratua sinatu du.
Ekain Zenitagoia Aranak (Durango, 1994) Durangoko Kulturalean eman zituen bere lehenengo urratsak. Kulturalarekin Bigarren B Mailara igo zen eta maila horretan 34 partidu jokatu eta zortzi gol sartu zituen. Ondoren, Bigarren B Mailan zebilen Amorebieta klubera joan zen eta urtebete eman zuen han 26 partidutan bederatzi gol sartuz.
Bere hurrengo etapa U.D. Ibiza taldean izan zen. 2020/21 denboraldian Bigarren Mailara igo zen klub horrekin eta harrezkero hantxe aritu da. Bigarren Mailan 71 partidu jokatu, 11 gol sartu eta bost asistentzia banatu ditu. Errege Kopako sei partidu ere jokatu ditu.