Euskal Herriko mugimendu feministak zaintzak erdigunean ipintzeko dinamika abiatu zuen martxoaren 8an, eta Durangaldeko kideek bide horri ekiteko hitzordu bi prestatu dituzte. Domeka honetan izango dute lehenengo geldiunea. Euskal Herri osotik joandako militante feministek Gasteizen egingo dute topo, bertan egitekoa den asanblada nazionalean, eta Durangaldeko mugimendu feministak bertan parte hartzera deitu ditu herritarrak. Horretarako hitzordua prestatu dute. Domekan, goizeko 8:30etan Maspeko aparkalekuan (Iurreta) elkartuko dira, gero denak batera Gasteizera joateko. Hori bai. Asanblada nazionalean parte hartzeko izena eman behar da honako inprimaki honetan.
Bestalde, Durangoko mugimendu feministak bigarren hitzordu bat prestatu du zaintzak erdigunean ipintzeko dinamikaren baitan. Apirileko azken zapatuan, apirilaren 29an, Durangoko II. asanblada egingo dute Andragunean. Topaketa 11:00etan egingo dute.
