Pilotaleku eraberrituak eskaintzen dituen aukerak baliatuz, Durangon zestarako zaletasuna berpiztea gura du Jai Alai eskolak. Ate irekien jardunaldi bat antolatuz ekingo dio bide horri. Datorren domekan —otsailak 26— izango da, 12:00etatik 14:00etara, Ezkurdi Jai Alain.
Aurreratu dutenez, Aritz Erkiaga txapeldun handia hantxe egongo da. Erkiaga gaur eguneko zesta puntari onenetakoa da, onena ez bada. Iaz sekulako denboraldia burutu eta Jai Alai Winter Series txapelketa irabazi zuen, beste hainbat lorpenen artean.
Domekako ekitaldia 8-16 urte bitarteko umeei zuzenduta dago bereziki, baina ateak irekita egongo dira publiko guztiarentzat eta zesta puntarentzat erreferentea den frontoi historikoa barrutik ezagutu ahalko dute bertaratzen direnek.
Joan nahi duenak, izena eman dezake durango.jaialai@gmail.com helbide elektronikoan edo
666 176 286 edo 650 482 198 zenbakira deituz. Whatsapp bat ere idatzi daiteke bi telefono
hauetako edozeinera.
Bazkideentzako saria
Azaldutakoaz gainera, klubak bazkide direnentzako aste horretan zehar egingo duen zozketaren irabazleei sariak banatuko dizkiete. Saria honako hau da: otsailaren 27an Ezkurdi Jai Alai frontoian jokatuko diren profesionalen partiduetarako bi sarrera.
