Durangoko Udalak Boni Macarrón omenduko duela iragarri du. ‘Boni’ urte askoan egon da Andra Maria elizpean beharrean, askotariko goxoki eta litxarreriak saltzen. Gutxi izango dira hark saldutako goxokirik sekula ahoratu ez duten durangarrak.
Bada, ‘Boni’ omentzea erabaki du udalak. “Andra Maria elizpeko martxanterak ikur izan dira eta izango dira durangar askorentzat; gure herriaren oroimen kolektiboaren parte baitira. Hori dela eta, oso garrantzitsutzat jo genuen udalak bere irudiari balioa ematea”, azaldu du gobernu taldeak.
Udala omenaldia prestatzeko lanetan dabil. Familiarekin egin du berba, eta aurreratu du Boniren beraren irudi errealista bat ipiniko duela bera zegoen tokian, arkupean.
EH Bilduk adierazpen instituzionala aurkeztu zuen duela bi urte Boni eta Durangoko emakume martxanterak omentzeko.