Atzo arratsaldean Euskal Herriko beste herri batzuetan egin bezala, datozen egunetan baheketa selektibo bat Durangon egingo zutela iragarri zuen Ignacio Garitano Osasun Saileko eta Osakidetzako Zaintza eta Kontrol Programaren koordinatzaileak. Orain Osasun Sailak jakitera eman du gaur hasiko direla baheketa selektiboarekin. Landako Gunean egingo dituzte probak eta sarrera pabiloiaren albo batean kokatuta egongo da, arboladiaren ondoan.
Probetara 13 eta 40 urte bitarteko durangarrak daude deituta. Osasun Sailetik azaldu dutenez, herritarrek aurretik hitzordua hartu beharko dute Landakoko Osasun zentrora deituta, 94 603 28 80, edo Osasun Kontseiluko telefonora, 900 203 050. 13 eta 18 urte bitarteko herritarrek (DBH, Batxillergoa eta LHn daudenek) berriz, ez dute aldez aurretik hitzordurik hartu beharko. Hauei jakinarazi egingo zaie PCR proba noiz eta non egin behar duten.
Horrez gain, emaitza guztiak sms bidez emango dituztela jakitera eman dute.