Durangoko Jaiak

Jaiak azken txanpan sartuta egon arren, zoramenerako hiru egun dituzte durangarrek

Ekaitz Herrera 2019ko urr. 18a, 11:30

Zapiak prest. Jaia egiteko gogoa prest. Jaietako lehenengo ekitaldiak pasatuta, durangarrak gertu daude arnasa hartu eta bigarren erasoari ekiteko. San Fausto jaien bigarren asteburua ate-joka dagoen honetan, musikak protagonismo handia hartuko du. Estilo askotariko kontzertuak izango dira ikusgai kaleetan zein txosnagunean. Bariku honetan bertan, lau kontzertuz osatutako gaua dute aurretik txosnagunean. Taula gainetik, egurra banatuko dute Azken sustraia, Liher, Ira eta Klag Klub taldeek.

Zapatuari dagokionez, Proyect Show DJ ikuskizuna egongo da Andra Marian, 22:00etan. Txosnetan, Luhartzen erromeria giroan dantzatuko dira 23:00etatik aurrera, eta, Ezkurdin, Nueva Alaska orkestrak oraingo eta lehengo hit handienak errepasatuko ditu. Domekan, giro lasaiagoko musika egongo da entzungai. Durangoko Orfeoia eta Tabira Udal Musika Banda arduratuko dira eginkizun horretaz.

Asteburuko beste ekitaldi batzuk patata tortilla txapelketa, erreka garbiketa, umeentzako jolasak eta dantza saioak dira.

Domekan, despedida
Domekan egingo dira ohiko despedida erritualak Durangon. Hori bai, tristeziari bizigarri  apur bategaz aurre egitea onuragarria izaten denez, jai giroko despedidak izango dira. Txosnagunean, 18:30ean egongo den txokolatadak gozotuko du Pantxikeren agurra. 19:30ean, kalejiran aterako dute Patxikotxu, txarangak lagunduta. 20:00etarako programatuta dauden su artifizialen ikustaldiak itxiko du aurtengo Durangoko jaien egitaraua. Hartzek nola, hala pasatu beharko dute negua Pantxikek eta Patxikotxuk. Bueltatuko dira, ohikoa duten aulkian jesarri eta durangarrak berriro zelatatzera. Ziur.

Durangoko jaietako egitaraua. 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!