Rugby zelaiaren ondoan dagoen gimnasiora lapurretan sartu ziren bart. Normalean han ez dute baliozko ezer izaten, baina oraingoan gimnasio barruko armairu batean gordeta zuten Errugby Tag jardunaldietan JAED elkartearentzat batutako dirua: 800 eta 1.000 euro artean. Udaltzaingoan salaketa jartzeko asmoa dutela azaldu diote DRTko ordezkariek ANBOTOri.
Ez da lehen aldia
Gimnasioko atzeko aldean —tenis pista aldetik— garaiera batean dauden leiho txikietatik sartu ziren. Leihoari kolpe bat emanda ireki zuten. Atzokoa ez da izan gimnasiora modu horretan sartu diren lehenengo aldia. Iazko irailetik hona hiru-lau bider sartu dira. Ildo horretatik, DRTko iturrien esanetan, Durango Kirolak erakundeari —azpiegituren arduraduna— hainbat bider eskatu diote neurriak hartzeko, baina momentuz egoerak berdin jarraitzen duela kexatu dira.