EH Bilduk informatu duenez, Jaurlaritzak 500.000 euro gorde gura ditu 2019ko aurrekontuan, Durango Operazioa garatzen joateko. Ikusita Erabaki plataformak galdeketaren aldeko 4.000 sinadura inguru aurkeztu dituela, hori kontuan hartu eta ea proiektua behin-behinean etengo duen galdetu dio sailburuari Ugartek. Baina, Jaurlaritzak ez du uste galdeketarik egingo denik.
EH Bilduren ustez "tamalgarria" da ETS eta udalaren jarrera. "EAJ eta PSE-EEren gobernuak ez du inolako asmorik durangarrei hitza eman eta hauek esan nahi dutena entzuteko. Interes ekonomikoak eta espekulatiboak herritarren gainetik jartzen dituzte, Durangoko herriak dituen beharrizanei jaramonik egin gabe", kritikatu dute koaliziokoek.
