Pilar Rios alkateordeak azaldu du "sorkuntza eta adierazpen feministak sustatzeko" ipini dutela martxan lehiaketa. Musika ere adierazpen matxisten eremu izan ohi dela jakitun, espazio horretan ekarpen feminista egitera doaz. Andra Mariko kontzertuagaz, kalean ere eduki feministak zabaltzea gura dute Itsasne Loroño teknikariaren esanetan. Usue Martinez abeslari durangarra da ekimenaren bultzatzaileetako bat, eta ekimena "era ludiko eta desberdin batean hausnarketara eramateko" tresna lez ikusten du. Hain zuzen ere, gazteak aktibatzea da helburu nagusia, belaunaldi berriak gaur egungo egoera aldatzeko gakoa izango direla uste dutelako.
Durangoko Musika Eskolaren, Bertsozale Elkartearen eta Berdintasun Kontseiluaren laguntza eduki dute lehiaketaren oinarriak finkatzeko.
Sagardoy, eredu
Prentsaurrekoa, Eneko Sagardoy Goya sariduna zoriontzeko aprobetxatu du Riosek, udalaren izenean. Esan du harro egotekoa dela Durangorentzat, eta Sagardoy "gazteentzat eredu" dela nabarmendu du.