Uribarri Barrutieta durangarrak errugbiaren elitean kokatu duten hiru jauzi handi eman ditu 2017an. Alde batetik, Durango Rugby Taldeagaz hezi den jokalaria Getxo Rugby Taldeagaz Ohorezko Mailan dabil aurten, Espainiar Estatuko mailarik gorenean. Urtarrilaren 21ean egin zuen debuta eta Getxok lortutako hiru entsegutatik bi bereak izan ziren.
Espainiako selekzio absolutuan ere tokia egiten ari da. Urtarril hasieran 15eko errugbi selekzio absolutuagaz lehenengoz jokatu zuen Galesen kontrako lagunartekoan. Egunotan, berriz, Sidneyn (Australia) dago World Rugby Series txapelketa jokatzeko. Zazpiko selekzio absolutuko partaide den estreinako aldia da.
