Ordenantzaren aurkako alegazioak aurkezteko asmoa daukate. Hogeita hamar egun dituzte alegazioak aurkezteko, eta horregatik, lana antolatzeko beharra ikusi dute: “Koordinatu, lanak definitu, eta datu bilketa egingo dugu hurrengo urratsak eman aurretik”. Aldundien legediak, beste udaletxeen ordenantzak eta datuak biltzen hasi dira, informazio horretatik abiatuta lan egiteko.
Hegoalde, Izki, Urki, Galtzareta, Antso Estegiz eta Santi Kurutzeko auzokideen ustetan, “badirudi diputazioak ezarritako neurriek bakarrik balio dutela”. Gainera, “Durangoko eremu ezberdinak neurtzeko irizpideak arbitrarioak izan dira”, salatu dute.
Pasa den asteko ez ohiko bilkuran erabaki zutenez, 180.000 eurotik gorako balio katastrala kalkulatu dieten etxeei “pribilegio-tasa” ezarriko zaie; 2017an 0,5eko indizea edukiko dute, eta 2018an 0,6koa. Beste etxebizitzek 0,2ko indizea izango dute.
Durangoko EH Bilduk asanblada ireki bat egingo du, herritarrekin, balio katastralen igoerei buruzko azalpenak emateko, eta baita haren aplikaziorako Durangon egin den ordenantzari buruzkoak ere. Batzarra eguaztenean izango da, azaroaren 16an, 19:00etan, Pinondon.
