Durangoko Mendibeltz eta Gu Lagunak areto futbol taldeek Palestinaren alde dirua batzeko egindako kanpaina arrakastatsua izan da. 569 kamiseta saldu eta 6.257 euro batu dituzte. "Ez genuen espero halako erantzunik. Gaur hitz bakarra daukagu: eskerrik asko", adierazi dute sare sozialetan. Batutako dirua UNRWA agentziari emango diote.
Kamiseten eskaerak Euskal Herritik (Durangalde, Aizarnazabal, Algorta, Amurrio, Araia, Arrigorriaga, Azpeitia, Barakaldo, Bilbo, Busturia…) nahiz kanpotik jaso dituzte: Madrildik eta Cadiztik, esaterako.
Azaroaren 15ean Euskadik eta Palestinak lagunarteko neurketa jokatuko dute San Mames futbol zelaian eta kamisetak egun horren aurretik banatzea nahi zuten, baina apur bat atzeratuko da. "Kamisetak egiten dituen enpresak gaur baieztatu digu azaroaren 20rako prest egongo direla”, azaldu dute. Kamisetak heltzen direnean "ahalik arinen" hasiko dira banaketa eta bidalketarekin.