Zapatuan junior mailako Uzarragara Igoera lehiatu zuten Antsuola inguruan. Ia 200 txirrindulari izan zituen lasterketa eskualdeko gazte batek irabazi zuen: Zornotzako F2-Informatika taldean dabilen Eñaut Bilbao mallabiarrak.
Lasterketako mendate nagusietan protagonista izan zen. Lehenengo, Deskargan gora eraso gogorra jo eta lasterketa hautsi zuen. Hamar bat laguneko taldetxoa sortu zen lasterketa buruan. Ondoren, Uzarragan gora, aurkarien erasoei aurre egin zien lehenengo, eta azken metroetan berak egin zuen aurrera garaipena eskuratuz. Bilbao gustura dago bere errendimenduarekin eta "sentsazio oso onak" izan zituela adierazi du.