Bartzelona eta Gran Canaria taldeen harrobietan hainbat urte eman eta gero, Oier Ardanzak Teknei Zornotza taldean aurkitu du egonkortasuna. Eskolta postuan, aurten gehiago jokatzen dabil eta ederto aprobetxatu du hori. Batez beste, 11,5 puntu daramatza, iazko bikotza baino gehiago. Bederatzigarren jardunaldian, Cultural Lenonesaren kontrako partiduan, Bigarren FEB Mailako jokalaririk baloratuena izan zen, 28ko balorazioagaz: 21 puntu, 9 errebote eta 5 asistentzia. Teknei Zornotzak Ardanzaren talentu guztia eta gehiago beharko du mailari eutsi gura badio. Aurten sufritzen dabil eta une honetan sailkapeneko azkeneko tokian dago.
Zilarrezko Ligan daramatzazun sei urteetan, aurtengoa da denboraldirik onena?
Bai, alde handiagaz da nire denboraldirik onena.
Zerk eragin du gorakada?
Gehiago jokatzen nabil, iaz halako bi. Klubean aldaketak egon dira eta jokalari asko lesionatuta egon da. Gero, entrenatzailearen eta, orokorrean, klubaren partetik konfiantza handiagoa sentitu dut. Dena kontuan hartuta, aurten protagonismo gehiago izaten ari naiz.
Zelan gogoratzen duzu jokalaririk baloratuena izan zinen partidua?
Zilarrezko ligan daramatzadan sei urteetan jokatu dudan partidurik onena izan zen. Hori seguru. Ez puntu kopuruagaitik bakarrik. Dena ondo irten zitzaidan: erreboteak, asistentziak…
Arketipo bi daude eskolta postuan: kanpotik jaurtitzen dutenak eta barrura sartzeko joera dutenak. Zeinegaz identifikatzen zara?
Aurreko denboraldietan, baloia hartu eta bota egiten nuen saskira. Aurten barneraketak eta gauza gehiago egiten nabil. Talde teknikoak asko lagundu dit alderdi horiek hobetzen. Nire jokoaren abanikoa zabaldu dut.
Teknei Zornotza sufritzen dabil. Zergaitik kostatzen ari zaio taldeari?
Lesio asko izan dugu. Entrenamendu askotan zazpi-zortzi jokalari baino ez gara batu eta horrek eguneroko lana baldintzatu du. Beharbada hor galduko genituen hainbat partidu irabazteko behar genituen hiru-lau puntuak. Izan ere, partidu asko gutxigaitik galdu dugu. Orain, neguko merkatuan, Mohamed Niang Huelvatik Zornotzara bueltatu da, eta Bassala Bagayoko Bilbao Basketek utzita etorri da. Biak pibotak dira, eta oso onak. Bagayoko ACBn jokaturikoa da, orain urte bi lesionatu zen arte. Jokalari gehiagogaz lan hobea egin ahal izango dugu entrenamenduetan, eta hori emaitzetan islatzea espero dugu.
Aspaldiko partez, aulkian aldaketa egon da. Mikel Garitaonandia joan egin zen eta aurten Javi García Panizo dabil entrenatzaile. Aldaketa honek zelan eragin dio taldeari?
Entrenatzaile bakoitzak bere jokamoldea du, baina guretzat hori ez da arazoa. Gure lana da jokamolde berrietara egokitzea. Entrenatzaile guztiekin gertatzen da.
Teknei Zornotzaren garaipen guztiak, sei, etxean heldu dira. Ematen du etxeko partiduak funtsezkoak izango direla mailari eusteko.
Etxekoak derrigorrez irabazi behar ditugu. Gure indargunea da. Azken urteetan oso partidu gutxi galdu dugu etxean. Aurkari guztiek azpimarratzen dute zer gatxa den Zornotzan jokatzea, eta hori aprobetxatu behar dugu.
Etxetik kanpora irabazteko, zertan hobetu behar da?
Esan dudan moduan, partidu asko puntu gutxigaitik galdu dugu. Detaile txikiak hobetu behar ditugu, eta horretan ahaleginduko gara.
Zornotzara heldu arte etxetik kanpora eman dituzu urte asko. Bartzelonan eta Kanaria uharteetan. Denborak ematen duen distantziatik begiratuta, zelan gogoratzen dituzu urte haiek?
Beste gazte batzuekin alderatuta, nire bizimodua desberdina izan da. Nire helburuak betetzeko, etxetik joan behar izan nuen. Ez zen erraza izan: saskibaloia, ikasketak, lagunak eta familia urrun… Baina, distantziatik begiratuta, ez naiz damutzen. Lagun asko izan dut, bizimodu ona, eta oso pozik nago egin dudanagaz.
Zornotzan daukazun egonkortasunak zeintzuk onura ditu?
Etxean nago, lagunekin, familia ondoan… Erosotasuna eta konfiantza garrantzitsuak dira jokalari batentzat, eta hori igartzen dut, egia esanda.
Orain beste modu batera ulertzen duzu saskibaloia?
Bai eta ez. Saskibaloia nire lana da. Goiz eta arratsalde entrenatzen naiz. Egunero hobetzea dut helburu, orain bost urte lez. Horretan berdina naiz.