Bizkaiko ligetan dabiltzan eskualdeko saskibaloi taldeek hainbat ospakizun izan zituzten joan zen asteburuan. Alde batetik, Lehenengo Mailako ligako txapelduna erabakitzeko finalak eskualdeko talde bi jarri zituen aurrez aurre: Durangoko Anbotopeko eta Zaldibarko Zaldua. Eurak izan dira aurtengo talderik onenak maila horretan. Partidua Durangoko Tabiran jokatu zen eta Anbotopekok irabazi zuen: 60-47. Hasieratik gehiago izan ziren durangarrak. Lehenengo laurdenean 13 puntuko abantaila lortu zuten: 23-10. Bigarrenean zaldibartarrak apur bat hurreratu ziren (33-24), baina hirugarrenean partidua erabakita geratu zen (57-35). Anbotopekok Lehenengo Mailako liga hiru bider irabazi du azken urteetan.
Bestalde, maila bat gorago, Zornotzak Bizkaiko maila bereziko liga irabazi zuen. Getxo Saskibaloi Taldeari irabazi zion finala (75-60) eta Bigarren Nazional Mailara igotzeko eskubidea eskuratu zuen.
Kiroltasuna nagusitu zen; irudian, Zalduako jokalariak aurkarien ospakizuna txalotzen (Argazkia: Luis Iturrioz).
Zornotza Saskibaloi Taldeko jokalariak igoera lortu ostean. (Argazkia: @BizkaiaBasket)