Bertan behera utzi dituzte udalekuak Abadiñon eta Iurretan

Ludoteka, Herri Udalekua eta Gaztetxoak Udalekua bertan behera uztea erabaki du Abadiñoko Udalak. Udalekuetan parte hartu behar zuten neska-mutilen gurasoei eman die hartutako erabakiaren berri udalak. Iurretako Udako Tailerrak programa ere bertan behera utzi dute, udal talde guztien adostasunarekin.

Bizkaia, Gipuzkoa eta Arabako  hiru foru aldundiek eta EUDEL Euskadiko Udalen Elkarteak erabakitakoa argudiatu du Abadiñoko udalak aurtengo udalekuak bertan behera uzteko. "2020ko Udalekuak egiteko baldintzak ez dira betetzen; izan ere, COVID-19ren egungo protokoloak ez dira bateragarriak koronabirusa ez zabaltzeko segurtasun neurriekin", azaldu dutenez.

Iurretako Udako Tailerrak programak 50 plaza eskaintzen zituen, zazpi eta hamalau urte bitarteko haurrentzat. Hala ere, aurten ez egitea erabaki dute,  Eudelek COVID-19ren hedapena geldiarazteko egindako gomendioei jarraituz. Halaxe azaldu dute udal arduradunek.

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.