San Blas egunean berriro harria jasotzen ikusi zintugun. Zer dela-eta hartu duzu plazara itzultzeko erabakia?
Luis Mari Bengoak berriro hasi behar nuela esaten zidan, burua ondo berotu zidan, eta, azkenean, txapelketara aurkeztea erabaki nuen. Berriketaldia sanblasetarako hilabete falta zela izan zen, eta entrenamendu handirik egin barik joan nintzen.
Abadiñon nagusitasunez irabazi zenuen. Itxaroten zenuen emaitza izan zen?
Egia esan, itxaroten nuena baino hobeto egin nuen. Abadiñoko txapelketara lau entrenamendu eginda joan nintzen, entrenatu barik ia-ia.
Norberaren herrian herri kirolen mundura itzultzea, eta, gainera, nagusitasunez irabaztea, berezia izango da.
Bai, oso berezia. Norberaren herrian muga altu ipinita garaipena lortzea izugarria da.
Asteburu honetan beste kanporaketa bat izango duzu, Oñatin. Zein asmogaz zoaz?
San Blasetan Abadiñon lortu nuen marka berdindu edo hobetzen ahalegintzea da asmoa.
Hemendik aurrera, txapelketa gehiagotan ikusiko zaitugu?
Baliteke, bai. Oraingoz, martxoaren 7an Azpeitian jokatuko den Urrezko Harrijasotze Txapelketako finala ondo prestatzea da nire helburu nagusia. Aurkari indartsuak izango dira han, baina neurea ematera joango naiz.
Sei urtean harririk jaso barik egon eta gero, izan duzu hartu-emanik kirol munduagaz?
Bai, pare bat urtean boxeoan ibili nintzen. Baina nire pisuan ez dago irteera handirik. Beraz, ixtea erabaki nuen.