'Memiimo': Minbiziaren aurka egiteko diseinuak, minbizia gainditu duen emakume baten eskutik

Yanire Granero 31 urteko gazte abadiñarrak bularretako minbizia eduki zuen, eta 2016an gainditu ostean, borroka harek busten duen proiektu bati ekin zion. Memiimo zigilupean turbanteak zapiak eta koleteroak egiten ditu, besteak beste, eta irabazien zati bat minbiziaren aurkako ikerketara bideratzen du. Aurretik bere aita ere minbiziaz hil zen, eta bizitako guzti horregatik, prebentzioaren eta ikerketaren garrantzia azpimarratu du.

Granerok kontatu du minbizia eduki zuenean, tratamentuaren eraginez ilea jausi eta ez zuela bere gustuko zapirik eta gehigarririk topatzen. Ordurako Diseinuko gradua ikasita zegoen, eta bizi izan zuen esperientziatik sortu ziatzaion bere marka sortzeko ideia. "Kolorez beteak sortzen ditu, ikuspuntu baikor bat emateko. Ez dakit bestela egiten", azaldu du gaur. Online saltzen ditu, merkatuetan egoten da, eta eskualdeko zein estatuko zenbait dendatan ere aurkitu daitezke bere lanak. "Pieza bakoitzak nire zati bat eramaten du", aipatu du, lanari ematen dion dedikazioagatik eta kutsuagatik.

Maristetako ekintzaileen proiektuan
Ideiagaz hasi zenean, Administrazioa eta Finantzak zikloa ikastea erabaki zuen Maristak ikastetxean, enpresa sortzeko baliagarri izateko. Gero, ikastetxe berean Urrats Bat proiektuan parte hartu du, ekintzaileei bideratutakoa. Hezkuntza sailak eta Tknikak bultzatzen duten proiektu bat da, erkidego mailan. Bada, aurten, proiektu sozial onenaren saria eman diote Granerori, eta gaur eman dituzte azalpenak. Maristetako irakasle eta komunikazio arduradun den Hostaizka Sainzek esan du "ohore bat" dela eurentzat Graneroren egitasmoak saria jaso izana. Oihane Iruskieta proiektuaren arduradunak azaldu du batez ere ekintzaileentzako aholkularitza lana egiten dutela.