"Itsas espagetia eskatzen digute gehien; zapore suabea du, eta testura atsegina"

Aitziber Basauri 2019ko ots. 10a, 10:30

Alga hautsa, deshidratatuta edo gatzetan jarrita, eta kontserbako algak saltzen dituzte Amaia del Hierro (Zaldibar, 1969) eta Garazi Sarrionandia (Mañaria, 1992) ama-alabek, orain  urte eta erditik hona. Galiziatik, Andaluziatik eta Bretainiatik ekartzen dute, Atlantikoan hartutakoa, eta hauen propietateak eta zaporea ezagutarazi gura dituzte. Harreman sare bat ere sortu gura dute, algekin hainbat produktu lantzeko: gazta, txokolatea, marmelada, garagardoa… Gustura dabiltza alga artean, esperimentatzeko aukera dutelako.

Itsasoa baino, mendia duzue gertuago. Nolatan alga artean sartuta?
Amaia: Beti izan dut itsasoagaz hartu-emana, Debakoa da ama. Baina, arrazoi komertziala dago atzean. Bagenekien nolako propietateak dituzten algek, baina ez nolako jokoa ematen duten sukaldean. Merkatu polita zegoela ikusi genuen.  
Garazi: Ekologikoa edo makrobiotikoa kontsumitzen dutenengandik aparte, kozinatzen tradizionala izanda gauza berriak probatu gura dutenak ere badaude. Propietate asko dituzte algek, eta goxo daude.

Ortukoak baino osasuntsuagoak dira itsasoko barazkiak?
Amaia: Bai, askoz ere propietate gehiago dituzte: mineral mordoa (iodoa, potasioa, zinka...), eta oligoelementuak eta bitaminak; batez ere, B12a. Proteina eta zuntz asko eta garbitzeko ahalmen handia.

Ez gaude ohituta algak jatera.
Garazi: Etxeko sukaldean ez dugu ohiturarik, ez. Baina chef handiek gero eta gehiago erabiltzen dituzte. Galiziatik ekartzen ditugu algak batez ere, eta han oso ezagunak dira. Jateko ohitura handia dago, itsasotik jasotzen dituzte eta haztegiak daude. Hemen, itsasoak ekarrita hondartzan batutako alga hilak datozkigu gogora. Algen mundua oso zabala da.

Zenbat alga mota daude?
Amaia: Hemen, 70 bat dira ezagunak eta guk 15egaz egin dugu lan. Asian gehiago erabiltzen dituzte.

Zeintzuk daude modan?
Garazi: Wakamea asko erabiltzen da, zopetan. Baina, gehien-gehien, itsas espagetia eskatzen digute; zapore suabea du, testura atsegina, eta erraz kozinatzen da. Egokia da probatzen hasteko.
Amaia: Kombu, arame eta isikia asko erabiltzen dira osasunagaz lotuta. Ulse, musgo eta letxuga daude modan.

Ez daukazue eukal kostako algarik?
Amaia: Jangarriak izateko, uren kontrol bat behar da. Galizian edo Cadizen, hemen ez daukagun industria daukate, eta alga freskoak ere kontsumitu ditzakezu; gatzetan kontserbatuta edo deshidratatuta ere bai. Gure kosta txikia ere bada. Bestalde, perretxikoekin gertatzen den lez, algak ezin dira edonola jaso. Agortu egingo lirateke. Kontu handia eduki behar da.

Aukera asko ematen dituzte sukaldean?
Amaia: Bai. Gura den zapore edo kolorearen arabera kozinatuko ditugu. Hori bai, neurri txikian eta beste zerbaitegaz jan behar dira.
Garazi: Testura aukera oso zabala da, eta itsasoaren zaporea dute. Barazkiek bezala, aukera asko ematen dituzte algek, baina desberdinak.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!