Jantokietan bertako produktuak eskaintzea da proposamenetako bat. "Landa-eremu bizia eta lehen sektorea sartzearen aldeko apustu politikoen laguntzarekin egin behar dira aldaketa hauek", esan dute. Gainera, modu horretan, jakien kilometroak murriztu eta ingurumenaren alde egingo litzatekeela uste dute. Bestalde, jantokiena zerbitzu izatetik arlo pedagogikora pasatzea beharrezko dela diote. "Eskola jantokiek duten balore pedagogikoa berriro hartzea nahi dugu eta gure seme-alaben elikadura gure inguru eta kulturarekin bat etortzea". Eskola batzuetan ez dute sukalderik eta hori aldatzea ere beharrezko ikusten dute.
Oharrean diotenez, Jaurlaritzak kontratazio-pleguak zabalduko ditu laster, eta horietan enpresa txiki eta ertainei ere lekua egitea eskatu dute. Orain arte enpresa handi batzuen esku egon da jantokien zerbitzua. Hala ere, Gure Platera Gure Aukerakoek eztabaida zabaldu eta gestioa deszentralizatzea gura dute, eskolek ere erabaki ahal izateko zelako gestioa egin gura duten. Adibidez, Katalunian bisitan izan ziren urrian hango eredua ezagutzeko; guraso elkarteek, ikastetxeek eta tokiko instituzioek ere jantokiak kudeatzeko aukera dute han.
