Datorren asteburuan Herbeheretako Hoogerhaide herrian jokatuko den Munduko Txapelketara sasoi betean helduko da Jonathan Lastra (Hirumet taldea). Ispasterren, Euskal Txirrindularitza Federazioko 2013-2014 denboraldiko azken lasterketan, 23 urtez azpiko onena izan da eta elite mailan laugarren sailkatu da Jim Aernouts, Vinnie Braet eta Aitor Hernandezen atzetik.
Caja Rural taldeagaz errepidean zentratu aurretik, bere lasterketa kuttunetakoa zen Ispasterko proban lan ona egiteko gogoa zuela adierazia zuen eta helburua bete du. Asteburuko munduko txapelketan iazko 15. postua hobetu eta hamabi onenen artean sailkatzea izango du helburu.
Emakumeetan Bizkaia-Durangoko txirrindulariak nabarmendu dira. Olatz Odriozolaren atzetik (bicicleta.com) Lierni Lekuona eta Zaloa Trevillok podiumera igotzea lortu dute.
