Berrizko Hiltegixe gaztetxeak eraso berri bat salatu du aste honetan. "Gaztetxera sartu garenean herriko hainbat gazte aurkitu ditugu barruan, atea indarrez zabaldu ostean bertako alkohola edaten. Gaztetxeko materiala eta altzariak apurtu eta egoera tamalgarrian uzteaz gainera, barrako edariak lapurtu eta gaztetxean bertan kontsumitu dituzte", salatu du bertako asanbladak ohar batean.
Asken asteetan Euskal Herriko eta Durangaldeko hainbat gaztetxeren aurkako erasoak eta lapurreta saiakerak salatu dituzte. Berrizko Hiltegixe gaztetxeaz gainera, Zaldibarko eta Elorrioko gaztetxeek ere salatu dituzte horrelakoak.
