Egunotan, txupinazoa bota aurretik irakurriko duten testua lantzen ari dira. Talde barruko zein kanpoko hainbat jendek egindako ekarpenekin osatuko dute adierazpen definitiboa.
Konpromisodun taldea
Batzuetan, mugimenduak indarra galtzen joaten dira denbora joan ahala. Baina pentsiodunen mugimendua ez da nekatu, eta berriztarrak horren erakusgarri dira. "20 bat lagun hasi ginen. Gerora, 70 edo 80 bat lagunera igo ginen eta, gaur egun, kopuru horri eusten diogu. Horrek konpromiso bat erakusten du", Alberdiren ustetan. Hala ere, atea denentzat dutela zabalik dio. "Desiratzen gaude jende gehiago batu dadin", esan du.
Eguaztenero, Bilbon egiten den pentsiodunen Bizkaiko batzarrera joaten da Alberdi, taldeko beste kide batzuekin batera. Han, asteko albisterik garrantzitsuenen berri jasotzen dute. Ondoren, jasotako informazioa Berrizen kontatzen dute, astelehenetan, 12:00etan, udaletxe aurreko plazan. Beste mugimendu batzuekiko elkartasuna ere erakusten dute: osasun arlokoak eta gazteen ingurukoak, besteak beste.
Berrizko manifestazioa
Ekainaren 17an, pentsiodunek Durangon manifestazioa egin zuten egun berean, Berrizen beste manifestazio bat egin zuten, udaletxetik Olakueta plazara.