Abadiñoko San Blas jaiek deneriko doinuak edukiko dituzte. Otsailaren 1ean, musika kontzertuak izango dira gaueko protagonistak. Eskualdeko talde batek zabalduko du gaua; Alertak, hain zuzen ere. Durangarrak Tú decides el final lan berria aurkezteko biran murgilduta daude, iaztik. Hogeita bi urteko ibilbidean, Blood Fire Death zigiluagaz kaleratu dute lan berri hau. Zuzeneko batzuk eskaini eta gero, disko berriaren aurkezpen birak 2020 osoa hartuko diela iragarri zuten iaz. Tartean, estatuan ere egitekoak dira biraren zati bat. Talde durangarrak doinu desberdinak jorratu ditu hamarkada bi hauetan zehar, beti ere, metala eta hardcorea oinarri hartuta.