"Jardunaldiak Traña-Matienako eta Zelaietako adinekoen elkarteen arteko topaketa eta maitasunari, harremanei zein helduaroko esperientzia afektiboei buruzko kultura eta hausnarketa proposamena uztartuko ditu", azaldu dute udaletik
Urriaren 1eko ekitaldiak kalejira batekin hasiko dira. Kalejira hauek Traña-Matienako eta Zelaietako adinekoen elkarteetatik abiatuko dira, eta Astolako kiroldegian bat egingo dute. Gune horretan topaketa bat egingo da Gerbas kantak eta lagunek girotutako luntx batekin. Programazioak 18:00etan jarraituko du Errota Kultur Etxean, Silver Film Festivaleko sei film laburren emanaldirekin. Horren ostean, 'Nola kudeatu haustura bat' solasaldia izango da.
Jarduera osagarri gisa, urriaren 5ean, 18:00etan Durangoko Elkartegian, ‘DenOn, Kaleak: adin guztietarako espazio publikoak’ hitzaldia emango du ProyeKta Urbes taldeko Patxi Galarraga arkitektoak.
Abadiñoko Udalak adinekoentzako topaketa, partaidetza eta aintzatespen guneak sortzen jarraitzearen garrantzia azpimarratu du, eskubide, autonomia eta ongizateari lotutako zahartzearen ikuspegia sustatuz: “Adinekoez ari garenean, ez gara zaintzaz edo beharrez soilik ari. Desioak, proiektuak, gozatzeko gogoa, harremanak izateko gogoa eta herriari ekarpenak egiten jarraitzeko gogoa duten pertsonez ari gara. Eta hori ere ongizate soziala da”.