Ildo beretik, Udalak hainbat mekanismo adostu ditu langileen ordezkariekin, antolakuntzari malgutasun handiagoa emateko eta udal langileen lan baldintzak hobetzeko. Besteak beste, telelanerako eta ordutegi kontrolerako ordenantzak onartu dira, barne antolaketa hobetzeko eta kontziliazioan eta administrazioaren eraginkortasunean aurrera egiteko asmoz.
Horrez gain, azpikontratatutako zerbitzuei dagokienez, lehentasuna eman dietela kontratuak behar bezala betetzeari eta langileen ongizateari azaldu dute udaletik. "Ildo horretan, gogora ekarri behar da udalak eta eraikinen garbiketa zerbitzuko langileen ordezkaritza sindikalak lortutako akordioa, langileen baldintzak hobetzeko helburua zuena", gaineratu dute.
"Administrazioa herritarrengandik gero eta gertuago egotea da gure helburua. Udalaren planifikazioa, jarraipena eta erantzuteko gaitasuna hobetzeko urrats garrantzitsuak egin ditugu, baina lanean jarraitu behar dugu administrazioa gero eta eraginkorragoa izan dadin eta herritarrei zerbitzu hobea eskaini diezaien", bukatu dute udaleko kideek.