Urien-Anbe gaztandegi abadiñarrak lorpen berri bat gehitu du bere garaikurren zerrendara: Bilbo Hiria gazta txapelketako lehenengo saria irabazi du gaur. Abadiñoko gazta Arabako, Bizkaiko, Gipuzkoako eta Nafarroako beste hamasei gaztagaz lehiatu da txapelketan, eta sari bikoitza irabazi du: lehiaketako sari nagusia eta Bizkaiko parte hartzaileen arteko lehen saria. Idiazabal jatorri izendapeneko gaztak izan dira parte hartzaileak.
Bilbo Hiria gazta sariketa Zazpikaleetako merkatarien elkarteak antolatzen du urtero. Aurtengoa, XXI. aldia izan da, eta dendarien elkarteko kideak eta kazetariak egon dira epaile lanetan. Gazta bakoitzaren itxura, azala, barruko orearen kolorea, usaina, zaporea eta testura ebaluatu dute.