Euskal Herriko bazter ugarik hasi dute urte berriko seigarren eguna soineko zuriz jantzita, tartean, Durangaldeak. Urkiolako Hoteleko Patxi Gaztelumendik jakinarazi digunez, "zuri-zuri" itzartu dira parke naturaleko bazterrak, "oso goizetik" gainera. Zuri daude hotela, santutegia, mendate inguruak, eta elurra mara-mara dabil orduotan.
Iragarpena
Euskalmetek iragarri duenez, abisu horia indarrean dago elurra, izotza eta tenperatura baxua tarteko, eta negu beteko eguraldia izango dugu gaur. Elur-kota 200-400 metro artean egongo da. Arratsaldean, zaparradak tartekatuagoak eta ahulagoak izango dira. Giroa hotza izango da eta ipar-mendebaldeko haizea finarekin sentsazio termikoa are baxuagoa izango da.
Bihar, eguaztena, elur-kota igo egingo da apur bat. 500 metroen bueltan kokatuko da goizean eta 1.000-1.200 metro artean arratsaldean. Prezipitazioari dagokionez, goizean euri apur bat egin dezake. Arratsaldean, ordea, gehiago.