Sinadura bilketa bat martxan ipini duzu. Zergaitik?
Autobusa erabiltzen dut 14-15 urte nituenetik, eta sarritan berba egin dut auzoko jendeagaz Elorrio-Bilbo autobus linearen inguruan. A3929 lineako autobusak astean zehar ez du geldialdirik egiten Muntsaratzen, eta auzora datorrenak eta hemendik norabaitera joan behar duenak Zelaietako autobus geltokiraino joan behar du, nahiz eta autobusa Muntsarazetik pasatu. Muntsaratzekoak gara abadiñar bakarrak Bilborako autobusa ez daukagunak. Zelaietakoek badaukate, baita Matienakoek ere. Aurreko batean, nazkatuta, udaletxera joatea erabaki nuen, eta, eurek gomendatuta, sinadurak biltzen hasi nintzen.
500 sinadura batu dituzu. Orain zer?
Instantzia bat bete dut eta sinadurekin batera, Abadiñoko Udaletxera, Bizkaiko Garraio Patzuergora eta Bizkaibusera bidali dut. Udaletxean esan didate eurak ere badabiltzala eskari honegaz, egin dutela eskaria Aldundian. Beraz, orain ikusi egin beharko da zeozer lortzen dugun ala ez.
Eta lortu ezean?
Sinadurekin ezer lortzen ez badugu, mobilizazioak antolatzeko prest nago. Autobusa gure musturren aurretik pasatzen da, baina ez da geratzen. Gainera, ez da horren gatxa geldialdi hori egitea; eurentzat ez du horrenbeste suposatzen, baina guretzat bai. Ikusi dugu arazoa ez dela gutxi batzuena, herritar askoren eskaria dela.