Abadiñoko Udalak eta URA agentziak hitzarmena sinatu dute Traña-Matienan uholdeak saihesteko egingo dituzten lanen lehenengo fasea hasteko. Lehenengo fase hori Sarria ibaian zentratuko da, Ibaizabalekin bat egiten duen inguruan eta lanen kostua URAk hartuko du bere osotasunean, 2.064.927 euro. Lanengaitik desjabetu beharko diren lurzatien kostua udalaren gain geratuko da. "Lan hauekin, abadiñarren segurtasuna bermatu eta herriaren garapenerako baldintzak bermatu gura ditugu", azaldu dute alde biek.
Abadiñoko alkate Mikel Urrutiak oso positibotzat jo du bi erakundeek sinatutako akordioa: "Azken hilabete hauetan, hasierako hitzarmeneko hainbat gai jorratu behar izan dira, eta horiek zehaztea beharrezkoa izan da. Horrenbestez, obren gainkostuak eta jaso daitezkeen dirulaguntzak erakunde bakoitzari esleituko zaizkio, fase bakoitzean duten partaidetzaren proportzioan. Eremuak garatu bitartean jaso beharreko hirigintza-kargak, 3 milioi eurotan baloratuak, oso-osorik udalarentzat izango dira, eta desjabetzeen ordainketa hasiera batean udalaren kontura izango da ".
Bestalde, udaletik jaktiera eman dute lehenengo fasea gauzatzeak Abadiñoko Hiri Antolamenduko Plan Orokorraren berrikuspenean aurrera egitea ahalbidetuko duela. Eta testuinguru horretan, udalak Astolako bizitegi-hazkundea Traña-Matienako iparraldera lekualdatzea proposatuko duela. Egun industria-eremua dena etxebizitza gune bihurtzeko.