Herritarren arteko pike sanoa lakorik ez dago jendearen arreta pizteko. Horrek esplikatzen du Abadiñoko Pilota Txapelketa Herrikoiaren hirugarren aldiak eragin duen ikusmina. Pilotariek serio hartu dute ardura, astegunetako entrenamenduetan Zelaietako pilotalekuko kantxa betetzeraino. Zaleek ahalegin horri erantzun diote asteburuetako jardunaldietan: 100 lagunetik gora batu dira sarritan, antolatzaileen esanetan.
Urritik hona 19 bikote aritu dira lehian maila bitan eta lau bikote onenek zapatuan, 18:30ean, jokatuko dute finala Zelaietako pilotalekuan. Lehenengo mailan Uriartek eta Amutxastegik Aspururen eta Urrutiaren kontra jokatuko dute. Bigarren mailan honakoa da finala: Izai-Urko / Soloko-Okarantza.