Ainhoa Urien (Abadiño, 1995) idazleak "nobela traza duen ipuin" lez definitu du Ehun zaldi trostan, bere azken sorkuntza. Oraintsu aurkeztu du, hain zuzen ere, Ignacio Aldekoa literatur beka irabazita idatzi duen liburua. "Ia urte bi pasatu dira lehenengo ipuinaren ideia izan nuenetik, eta ipuin hori ere Ehun zaldi trostan deitzea erabaki nuen", azaldu du Urienek. "Liburua ezin da ulertu lehenengo ipuin hori barik. Bertako giro, usain, hartu-emanek sorturiko unibertso horietatik sortu dira gainerakoak; autonomoak dira, elkarreraginean indar handiagoa duten arren", argitu du Urienek. Idazketa prozesuari buruz, idazteko izan duen denbora "mugatua eta baldintzatua" izan dela azpimarratu du. "Zerbait egiten ahalegindu banaiz, dialektika batzuk esploratzen eta atzean dituzten ustezko dikotomiak kolokan ipintzen izan da", borobildu du aurkezpena Urienek. Maiatzean Durangoko Hitz liburu dendan aurkezpena egingo duela aurreratu du.
Arabako Foru Aldundiak, euskarazko literatura sorkuntza sustatzeko, ipuin modalitatean sortu zuen Ignacio Aldekoa beka; hain zuzen ere, Urienek 8.000 euro jaso ditu beka irabazita. Ainhoa Urienek 2020an kaleratu zuen bere lehenengo liburua, Poesia zaurien ukendu (Xabier Leteren arrastoan) saiakera. Ehun zaldi trostan narraziogintzan egindako lehenengo lana du.