Udaletik jakitera eman dutenez, Zelaieta auzoan aurreikusitako kokalekuak zailtasun handiak ditu irisgarritasunari dagokionez, egoitza Arrankurri eremuaren goiko aldean eraikiko baita. Horrez gain, aurreko legegintzaldian Bizkaiko Foru Aldundiarekin landutako proiektuan ez zela ibilgailuentzako aparkalekurik aurreikusten azaldu dute.
Egoera hori aztertuta, Udalak bidearen malda leuntzeko eta egoitzaren inguruan aparkaleku bat sortzeko lanketa burutu du azken hilabeteetan. Prozesu horretan, bertan aurreikusten den trafikoari buruzko azterketa bat egitea eskatu zion Aldundiari, inguruan izango duen eragina neurtzeko. Gauzak horrela, irisgarritasuna eta aparkalekuentzako eskaintza hobetzeko, arau subsidiarioak moldatzea "beharrezkoa eta ezinbestekoa" zela ondorioztatu zuen udalak. “Arrankurriko goiko aldean kokatuko den egoitza da, eta erabiltzaileak herrigunetik aldenduta egoteaz kezkatuta geunden. Gainera, aparkaleku gehigarririk ez zegoela ikusita, arduratuta geunden Zelaietan gerta zitekeen ibilgailu gainkargarekin", gaineratu dute.