Abadiñoko Udalak San Prudentzio eta San Trokaz jaietan erregistraturiko gertakarien balantzea egin du. Guztira hamabi gertakari erregistratu ziren udaltzaingoak, Ertzaintzak eta Traña-Matienako txosna batzordeak ipinitariko bitartekoetan. Honako hauek: bi borroka, hiru lapurreta, horietako bat mehatxupekoa; eta zazpi eraso, eraso matxistekin lotutako bi eta adinbakoen artean emandako beste bi. Azken horiek “ardura bereziarekin” jaso ditu gobernu taldeak.
Salaketa
Mikel Urrutia alkateak adierazi duenez, "eraso jarrerek ez dute tokirik gure gizartean". Era berean, gobernu taldeak "Abadiño herri seguru bat izateko lan" egiten duela, eta erasoak jasan dituztenei laguntza eskaintzeko prestutasuna agertu diela gogoratu du. Naiara Bildosola berdintasun zinegotziak azpimarratu duenez, "eraso matxistek gaur egun, zoritxarrez, lerroburuak betetzen jarraitzen dute. Abadiñarrok eta emakumeok jaiak askatasunetik bizi gura ditugu. Abadiñok eta udal gobernua osatzen dugunok gogor egingo dugu lan erasorik gabeko herri bat eta, hortaz, jaiak izan ditzagun”, adierazi du.