Abadiñoko Udaletik jakinarazi dutenez, herri galdeketaren proposamena abadiñarren eskarietatik sortu zen: "Herritar askok jakinarazi zigun beharrezkoa zela kaleen antolaketa hobetzea". Horri erantzunez, udaleko partaidetza batzordeak prozesu bat hasi zuen herritarrekin batera, eta hainbat herritarrek parte hartu zuen bertan.
Prozesu horretatik bost proposamen irten dira eta, udaletik azaldu dutenez, orain proposamen horien artean aukeratu ahal izango dute abadiñarrek. "Abadiñarren parte hartzeagaz herria hobetzeko ariketa bat izango da herri galdeketa. Baina, horrez gainera, gizartearen parte hartzea, adostasuna eta gobernu estilo zabal bat lantzeko tresna ere izango da", adierazi dute.
Hori horrela, datorren asteetan informazio gehiago emango dutela jakinarazi dute, eta orduan azalduko dutela zer, noiz, zelan, zertarako eta gainerako guztiak.