Abadiñoko Udaletik jakitera eman dutenez, joan den astetik, Traña-Matienako osasun-zentroak ez du pediatria zerbitzu espezifikorik, eta, ondorioz, familiek inguruko beste udalerri batzuetara joan behar dute. Egoera hori ikusita, gobernu-talde berriak bilera bat eskatu du Barrualde-Galdakao ESIko arduradunekin, berehalako konponbidea bilatzeko.
"Pediatriako titularrak erretiroa hartu zuenetik, pediatria zerbitzuak gorabehera asko izan ditu, eta joan den astetik ez dago zerbitzurik. Egoera horren berri izan bezain laster bilera eskatu genuen arlo horretan eskumenak dituen Osakidetzarekin, epe labur zein luzerako konponbidea behar dela uste dugulako", azaldu du Mikel Urrutia alkateak.