Zelan sortu zen Portugaleko ligan jokatzeko aukera?
Liga amaitzear zegoela, ordezkariak deitu zidan. Portugaleko lehenengo mailako ekipo batek ni fitxatzeko interesa zuela azaldu zidan. Proposamena bidali zidaten eta ingurukoekin berba egin eta gero baietz erantzun nien.
Buelta asko eman zenizkion kontuari?
Hasieran bertigo apur bat eman zidan, baina eman didaten aukera oso ona da niretzat. Portugaleko lehenengo mailako liga itzela da. Ez zitzaidan asko kostatu erabakia hartzea.
Hilabete batzuk daramatzazu Portugalen. Zelan zabiltza?
Apurka-apurka egokitzen nabil. Hasieran apur bat gatx egiten da, beste hizkuntza bat dutelako, beste herrialde bat delako, eta jokatzeko beste modu bat dutelako. Baina hobetzen nabil, eta geroago eta gehiago integratzen. Lagunak eta familia ere etortzen dira bisitan. Bikotekidea ere nigaz etorri da orain, eta horrek laguntza handia eman dit.
Egokitzea ez da hain erraza izaten.
Espainiar bi etorri dira eta hizkuntzak laguntzen du hartu-emanetarako. Portugesa ikasten nabil, eta egoera hobetzen dabil. Gaztelaniaren oso antzekoa dela ematen du, baina ez da hain erraza. Eurek askoz hobeto ulertzen dute gaztelania guk portugesa baino. Aurten ingelesa ikasteko asmoa ere badaukat.
Zelakoa da Vizela herria?
20.000 biztanle inguruko herria da, oso herri polita. Oso giro ona dago bertan, batez ere asteburuetan.
Zelan bizi dute futbola?
Intentsitate handiz. Vizela herria futbolaren inguruan hazi dela esaten dute.
Herri txikietan familiarragoak dira? Ezagutzen zaituzte kalean?
Vizelara irten eta jendeak ezagutzen gaitu, bai.
Ligari dagokionez, zein da taldearen helburua?
Mailari eustea. Hortik aurrera, ikusiko dugu.
Liga hasieratik gehiago espero zenuten?
Lehenengo jardunaldietan talde indartsuen kontra jokatzea tokatu zaigu, baina zeozer gehiago lortzea espero genuen.
Zelan zabiltza denboraldi hasierako jardunaldietan?
Oraingoz, ez nabil asko jokatzen. Nire helburua da entrenamenduetan demostratzea jokatzeko moduan nagoela. Ahalegin guztia egiten nabil eta aukera ematen didatenean aprobetxatu egingo dut.
Zein itxura hartzen diozu Portugaleko ligari?
Oso talde onak daude. Lehenengo jardunaldian Lisboako Sportingen aurka jokatu genuen. Talde batzuk oso indartsuak dira.
Zelako azpiegiturak dituzue Vizelan? Zelan egoten da zelaia?
Zelaiak harmaila bi ditu, eta nahiko beterik egoten dira biak.