Traña-Matienako pilotalekuak goma gaineko 580 kilora arteko Bizkaiko Sokatira Txapelketako bigarren jardunaldia hartuko du zapatuan (abenduak 3), 18:00etatik aurrera.
580 kiloko kategoria misto horretan Bizkaiko hiru talde lehiatuko dira, bakoitza zortzi tiralariz osatua. Abadiñok hiru talde izango ditu, Gaztedik bi eta Goiherrik bat. Abadiñokoaren ostean, hirugarren eta azken jardunaldia faltako da txapelketa amaitzeko: abenduaren 17an Elorrion lehiatuko dena.
Umeentzako herri kirolak
Egun berean baina Bizkaiko txapelketaren aurretik, 16:00etan, umeentzako herri kirol jarduerak antolatuko dituzte Traña-Matienako pilotalekuan. Umeen artean herri kirolerako zaletasuna sustatzea da helburua. Lokotx-batzea, ingude-jasotzea, giza-proba, txinga-eroatea eta sokatira probatzeko aukera egongo da, besteak beste.
Euskal Joko eta Kirolen Federazioak eta Abadiñoko Sokatira Taldeak antolatuta, Abadiñoko Udalaren eta Bizkaiko Foru Aldundiaren laguntza du zapatuko ekitaldiak.