Behean, 250 abadiñar. Goian, 4 bilbotar. Aiora Renteria eta bere mutilak. Dezibelioak topera. Distortsioz beteriko kantu bat orain. Pop kutsuko beste bat gero. Baina kantu guztietan, Renteriaren ahots indartsua gainetik. Eta halantxik, apurka-apurka, giro umela berotzea lortu dute. Eta nola gainera! Diskografiako kanturik esanguratsuenak eskaini dituzte. Ez da falta izan bideoan jasotako “Negua joan da ta” enblematikoa. Ezta Kukutza gaztetxea izandakoari eskainitakoa ere. Azken kantu honekin eman diote bukaera kontzertuari. Eta aulkian kabitu ezinda egon da bat baino gehiago. Zutik, txaloka. Txilizoka. Gehiagorako gogoz. Baina horretarako udaberri berri bat itxaron beharko zaio. Gelditu dena esker ona izan da. Abadiñarrek eskertu egin dutelako kontzertua, eta baita musikariek ere.