Segurtasun Sailak jakinarazi duenez lan-istripu bat izan da goizeko 8:25etan Abadiñon, Lebario auzoko Cosmos Bizkaia enpresan. Langilea oxigeno bonbonak manipulatzen zebilen garabi batekin, eta Osalanek adierazi duenez, kargak harrapatuta geratu da behargina. Suhiltzaileak behargina erreskatatzera joan dira baina ezin izan dute ezer egin. Langilea hilda zegoen ordurako. Behargina gizonezkoa dela zehaztu du Segurtasun Sailak. Transportes Eguiara y San Juan enpresarentzat egiten zuen lan, Osalanek adierazi duenez.
LAB sindikatuak prentsa oharrean azaldu duenez, "azken hildako honekin eta urtea hasi zenetik, gutxienez 16 dira Euskal Herrian lanean hildakoak, eta Joaquin Beltranek desagertuta jarraitzen du Zaldibargo zabortegian iazko otsailaren 6tik". Sindikatuak gaineratu duenez, "langileriak pairatzen duen laneko biolentzia arazo sozial larria da, arazo estrukturala, inposatzen diguten politika neoliberalaren ondorio zuzena. Prekarietateak, azpikontratazioak eta prebentzio neurrien ezak hil egiten gaituzte". LAB sindikatuak elkartasuna eta babesa adierazi die hildako langilearen senide eta gertukoei. Era berean, langile eta herritarrei dei egin die hurrengo egunetan antolatuko diren mobilizazioetan parte hartzera.
ELA sindikatuak dioenez, "lan merkatuan guztiz erroturik dagoen prekarietatea salatu behar dugu berriro ere;
lan baldintza txarrak, lan erritmo jasanezinak, jardunaldi amaigabeak eta prebentzio araudegiaren
betegabetze argiak ohitura bihurtu dira eta tamalez, ondorio lazgarri hauek pairatzeko aukerak gero eta
gehiago haunditzen dituzten faktoreak bihurtu". Gaineratu dutenez, "beste behin ere azpikontratatutako
enpresak direnean, ez-betetzeak biderkatu egiten direla argi ikusten dugu".
Podemos Ahal Dugu Durangaldeak istripuaren inguruko prentsa oharra kaleratu du. "Durangaldeko lantokietan dagoen lan prekarietatea salatzen dugu, eta enpresetan prebentzio eta segurtasun neurriak areagotzeko beharra azpimarratzen dugu", azaldu du Podemos Ahal Duguk.