Iñaki Rekalde Abadiñoko Ogasun, Ekonomia sustapen eta Enplegu arloko zinegotziak jakinarazi duenaren arabera, 5, 30 eta 40 euroko deskontuak lortu ahal izango dira bonu horiekin. Guztira, 99.260 euro bideratu ditu Abadiñoko Udalak kanpaina honetara. "Herriko merkataritzari 165.920 euroko itzulia ekarriko diete bonuek. Abadiñoko familia askok ataratzen dute bizimodua establezimendu horiekin, eta une hauetan sekula baino babes gehiago eman behar zaie koronabirusaren pandemiak euren negozioari egindako kalteari aurre egiteko".
Bonuak irailaren 1etik aurrera jaso ahal izango dira udal bulegoetan, eta Udal mediatekan; irailaren bigarren astetik aurrera Errota kultur etxean ere banatuko dituzte.
EH Bilduren proposamenak
Abadiñoko EH Bilduk ohar batean adierazitakoaren arabera, udal gobernu taldeak alderdi independentistak zirriborroari egindako hainbat ekarpen hartu ditu kontutan. "Langabetuentzako eta 65 urtetik gorakoentzako laguntzak igotzea proposatu genuen". Horrez gainera, koronabirusak eragindako ondorioei aurre egiteko plangintza integral bat garatzea eskatu dio udal gobernu taldeari.