Abadiño eta Fuensanta de Martos (Andaluzia, Espainia) herriak senide izango dira bihartik aurrera. Izan ere, San Prudentzio jaien barruan, senidetzarako ekitaldi instituzionala egingo dute. Industrializazioaren eraginez, 60ko hamarkadatik aurrera Jaengo herritik jende ugari etorri zen Traña-Matienara, eta migrazio hori dago hitzarmenaren oinarrian. Jose Luis Navarro alkatea ere handik etorri zen familiagaz, urtebete zeukanean.
Navarrok ilusioz hartu du senidetza. “Herriko bizilagun batzuek eskatu dute, eta, gainera, ni jaio nintzen herria da”, kontatu du alkateak. “Bere sasoian jende ugari etorri zen handik, eta haien seme-alaba asko bizi dira hemen”, azaldu du Navarrok.
Fuensanta de Martoseko udalak baietza eman zion eskaerari. Ondorioz, bihar talde bat etorriko da senidetza egia bihurtzera. 19:30ean izango da ekitaldia, Errotan.