Abadiñoko Tornosolo trinketeak Euskal Herriko Elite Txapelketako finala hartu zuen barikuan. Laukoteko protagonista bat abadiñarra zen: Aitor Arabiourrutia. Hilabete baten barruan bigarren txapela jantzi gura zuen, baina aurkariak gehiago izan ziren (24-40).
Arabiourrutia eta Iker Iraola beti atzetik joan ziren markagailuan. Partidu erdira arte begibistan izan zituzten kontrarioak (8-12, 12-19), baina bigarren erdian Maizek eta Arbizuk alde erabakigarria hartu zuten (15-27, 19-35). Maizek 12 tanto egin zituen sakez eta Arbizuk, beteranoa den arren, oraindik kantxan erraz ibiltzen dela erakutsi zuen eta min handia egin zuen frontis erdiko kolpeagaz.