Azaroaren 20an, elite mailako Tornosolo Kopa hasiko dute Abadiñon, eta, aurreko asteetan, promesen mailako txapelketa jokatzen ari dira. Onenek elite mailako txapelketan parte hartu ahal izango dute. Orain arte aurrera egitea lortu duten lau promesek finalerdiak jokatuko dituzte, gaur, 19:30ean, Abadiñoko trinketean. Abadiñar bi izango dira tartean. Asier Aspuruk Iker Gordon izango du aurkari. Biek ala biek erraz kanporatu zituzten Uribe eta Ziarrusta final laurdenetan.
Aitor Arabiourrutiak Liher Gandiagaren kontra jokatuko du finalerako txartela. GRAVN-eko txapeldun Gandiaga da faborito garbia, baina ez dago sasoirik onenean, eta abadiñarra sorpresa ematen saiatuko da, nahiz eta kantxa osoko buruz burukoa ez den bere espezialitate gustukoena.