Euskal Ligako mailarik gorenean jokatuko du Abadiño Xake Taldeak datorren denboraldian. Joan zen asteburuan lortu zuen igoera, Lehen Mailako ligako azken aurreko jardunaldian. Alain Prieto, Ieray Galtzagorri eta Sarralde anaiek osatu dute aurtengo talde titularra.
Datorren denboraldikoa ez da Ohorezko Mailan jokatuko duten lehen aldia izango. Aurretik ere izan ziren, hiru urtez. Ondoren, xake taldearen beheraldia heldu zen. Lehenengo Mailara jaitsi ostean, han irauteko motibazioa falta izan zitzaien xakelari nagusiei: asteburuetako konpromisoak, sarritan urruti joan beharra… Horregatik, eurek hala erabakita, mailari uko egin zioten, eta Bizkaia mailara jaitsi ziren. Sarralde anaiak taldera batu zirenean, taldearen ilusioa apurka berpiztu egin zen, eta behetik gorako bideari ekin zion, birritan mailaz igo, eta berriro Ohorezko Mailara heldu arte.
Oro har, Abadiñoko klub guztiak maila handian dabiltza aurten. Esaterako, Bigarren Mailan Abadiño C igoera postuan dago, eta asteburuan Conteneo liderraren aurka lehiatuko da. Hirugarren mailatik hiru talde igoko dira, eta baliteke hirurak Durangaldekoak izatea: Abadiño D, Abadiño E eta Larrasoloeta B. Bizkaia mailako ligetan jardunaldi bi falta dira amaierarako.